Nyentuk ngagai 2023 Sarawak bisi urung 8,015 hektar ladang lada, nambah 1.8 peratus dibandingka enggau 7,870 hektar ba taun 2022
“Peminta dunya ba Lada Sarawak agi tinggi lebih agi ari menua baka Jipun, China, Taiwan enggau Korea Selatan,”
Dato Sri Dr Stephen Rundi Utom
Menteri Industri Pemakai, Komoditi enggau Pemansang Wilayah
KUCHING: Sarawak agi nyadi pemansut besai lada ti meri sukung ngagai 98 peratus lada ti ditanam di Malaysia.
Menteri Industri Pemakai, Komoditi enggau Pemansang Wilayah, Dato Sri Dr Stephen Rundi Utom madahka, nyentuk ngagai 2023 Sarawak bisi urung 8,015 hektar ladang lada iya nya nambah 1.8 peratus dibandingka enggau 7,870 hektar ba taun 2022.
“Direjista ari baruh Geographical Identification (GI) enggau ngena chara ‘profiling’ ti terit dikena nagang enggau nyaga jenama Lada Sarawak dalam dagang.
“Peminta dunya ba Lada Sarawak agi tinggi lebih agi ari menua baka Jipun, China, Taiwan enggau Korea Selatan,” ku iya.
Iya nyebut pekara nya maya nyimpul jurai M-FICORD ba Aum Kunsil Nengeri (DUN) ditu, kemari.
Bejaku baru iya madahka, taja pan Sarawak ulih eksport tauka nyual nyadi komoditi tang potensyel lada dalam industri produk ti nangakanka nya besai diserungkai.
“Dikena ngenegapka pemansang industri ladan enggau nentuka pemeruan nyadi wilayah pemansut lada pemadu tebilang di menua tu, opis menteri aku nengah Lembaga Kemajuan Tanah Sarawak (SLDB) nyerungkai inisiatif hiliran strategik ungkup Lada Sarawak nengah pengawa numbuhka kilang mungkus moden.
“Tuju inisiatif tu kena nyungkakka industri lada di menua tu seraya meri insentif ngagai penyereta sektor swasta dalam hiliran lada,” ku iya.
Kelimpah ari nya, lebuh ti ngenang projek jalai enggau infrastruktur menua pesisir, iya madahka , ari baruh RMK12, Opis Menteri Pemansang Menua Pesisir enggau Wilayah (KKDW) Malaysia ngungkupka RM1.72 bilion ngagai Opis Parit enggau Entali Ai (JPS) Sarawak kena bejalaika 19 projek ari baruh Program Jalai Menua Pesisir (JBALB).
Kediatu, ku iya, tiga projek udah tembu, siti projek benung digaga enggau 10 projek dalam renggat turai tukuh enggau lima projek agi dilanggur.
Ungkup belanja sepenyampau RM22.24 juta udah dikemendarka ari baruh RMK12 kena bejalaika lima projek ari baruh Projek Jematan Menua Pesisir (JMLB), ku iya.
Nitihka iya, diatu bisi empat projek ba renggat dilangkar enggau siti agi projek ba renggat dilanggur.
“Dalam taun 2024, KKWD mega bisi ngangkupka RM6.5 juta ngagai JPS Sarawak kena bejalaika 12 projek ari baruh Program Ameniti Sosial (PAMS) sereta semua projek tu agi ba renggat dilanggur.
“KKDW mega ngungkupka RM4.85 juta kena bejalaika 12 projek ari baruh Program Jalan Perhubungan Desa (JPD) sereta ke diatu, semua projek tu agi ba renggat dilanggur,” ku iya.
https://www.utusanborneo.com.my/2024/05/15/sarawak-meruan-nyadi-pemansut-98-peratus-lada-ti-ditanam-di-malaysia
Sumber : Utusan Borneo